ՍԱՐԿԱՎԱԳԱԳԻՐՔ

ՆԵՐԱԾՈՒԹՅՈՒՆ

ՊՈՂՈՍ ԱՌԱՔՅԱԼԻ ԱՌԱՋԻՆ ՆԱՄԱԿԸ ԿՈՐՆԹԱՑԻՆԵՐԻՆ

Կորնթոսն Աքայիա նահանգի մայրաքաղաքն էր՝ Հունաստանի կարևոր քաղաքներից մեկը:

Կորնթոս քաղաքը ծաղկուն և հռչակավոր էր ոչ միայն վաճառականությամբ, այլ նաև մշակութային եռուն կյանքով, իմաստասիրական և կրոնական շարժումներով, որովհետև այստեղ ապրում էին տարբեր ազգի քաղաքացիներ: Մյուս կողմից, սակայն, անբարոյությունն էլ սանձարձակ էր: Այս բոլոր հոսանքներն իրենց ազդեցություններն էին ունենում նորահաստատ եկեղեցու վրա՝ պատճառ դառնալով զանազան դժվարությունների: Քրիստոնեական եկեղեցու հիմքը Պողոսի կողմից այնտեղ դրվեց, երբ առաքյալն այստեղ մնաց տասնութ ամիս՝ առաքելական իր երկրորդ ճանապարհորդության ընթացքում:

Կորնթացիներին ուղղված առաջին նամակը Պողոսը գրել է 54-57 թվականների միջև, Եփեսոսից (16.8)՝ իր առաքելական երրորդ ճանապարհորդության ընթացքում: Այս նամակով առաքյալն զբաղվում է այն բոլոր հարցերով, որոնք խռովում էին Կորնթոսում հաստատված եկեղեցու կյանքը և որոնք կապ ունեին քրիստոնեական կյանքի և հավատի հետ:

Պողոս առաքյալի գլխավոր մտահոգությունն այն անբարոյությունն ու պառակտումներն էին, որ գոյություն ունեին եկեղեցու կյանքում: Նա քննում է ամուսնության և խղճի հետ կապված հարցեր, եկեղեցու հեղինակությունն ու կարգուկանոնը, Սուրբ Հոգու պարգևները և հարության գաղափարը: Խոր քննարկումներով նա ցույց է տալիս, թե Ավետարանն ինչպես է դիտում այս հարցերը, և տալիս է դրանց պատասխանները:

13-րդ գլխում խոսում է սիրո՝ որպես Աստծու կողմից մարդուն տրված լավագույն նվերի մասին: Այս գլուխը նամակի առավել հայտնի հատվածն է:

ՆԱՄԱԿԻ ԱՄՓՈՓ ԲՈՎԱՆԴԱԿՈՒԹՅՈՒՆԸ

✠ Նախաբան (1.1-9)

✠ Բաժանումներ եկեղեցում (1.10-4.2)

✠ Սեռային բարոյական հասկացողություն և ամուսնական կյանք (5.1-7.40)

✠ Քրիստոնեական դիրքորոշում հեթանոսական սովորությունների նկատմամբ (8.1-11.1)

✠ Եկեղեցու կյանքը և պաշտամունքը (11.2-14.40)

✠ Քրիստոսի հարությունը և հավատացյալների հարությունը (15.1-58)

✠ Քրիստոնյաների նվերը Հրեաստանի հավատացյալներին (16.1-4)

✠ Անձնական հարցեր և եզրակացություն (16.5-24)